Terra Sen Amos – Axencias

“O Bloqueo dos Estados Unidos contra Cuba é inaceptábel, inxusto e inhumano”. Ana Miranda comezóu con estas palabras a sua  intervención no debate sobre o Acordo de Diálogo  e Cooperación entre a UE e Cuba. A deputada do BNG na Eurocámara, acusou a extrema dereita de tentar unha nova resolución contra a illa “cando sabemos que o cerco contra Cuba foi aumentado e recrudecido dende 2019: Trump, xa cun pe fóra da Casa Branca, meteu Cuba na Lista de Paises Promotores do Terrorismo; ao país que ten axudado coas súas brigadas médicas a millentas persoas no mundo enteiro, por favor!” Ana Miranda cualificou de descomunal a  multiplicación sen taxa de medidas para reventar a economía e prexudicar a poboación. “Cortaron as relacións consulares, impiden a reunificación familiar e atrancan a produción de visas para os residentes na illa puideren viaxar ou emigrar”. A deputada incidiu no aumento do bloqueo durante a pandemia “dirixido a impedir a importación de ventiladores pulmonares e a produción de osíxeno, asi como frustrar a produción industrial das vacinas cubanas; un Bloqueo que provoca dano, sufrimento, privacións, angustia e viola o dereito humanitario, e isto non o dí a euro-deputada do BNG  senón as Nacións Unidas”.

O debate sobre o Estado do Acordo de Diálogo Político e Cooperación entre a UE e Cuba foi promovido pola fracción reaccionária do Parlamento de Bruxellas, nomeadamente a que representa o partido de Feijóo, saudoso do estilo subalterno de José María Aznar co goberno de George W. Bush contra Cuba e o combinado ultra-dereitista de demo-cristianos e militantes do libre comercio fundidos na ALDE e agora identificados coa definición RENEW.  As intervencións desta fracción non identifican problema en Cuba atribuibel a un bloqueo imperialista que durando más de 6 décadas chega ao paroxismo de impedir a illa a importación de medicamentos e material clínico en plena pandemia.

Esta fronte alineada coa política da actual Casa Branca contra Cuba, obxecta no Parlamento que fose Josep Borrell en nome da UE que visitase Cuba, por consideraren que o cargo implicaba pola súa importancia aos 27. Borrell recordou que él, personalmente, e a UE e a ONU están contra o bloqueo; que o voto da UE na Asemblea annual da ONU condena o criminal cerco imperialista contra Cuba. “Un non pode deixar de pensar como sería a historia do mundo se as palabras e o espírito de Obama na Habana tivesen continuado”.

Manu Pineda, do Grupo de Esquerda, dixo que Borrell vira en Cuba un pobo a pasar necesidades, e ao mesmo tempo puido comprobar que é un pobo consciente de quen ten a responsabilidade dos seus apuros que non é outro que un bloqueo estadounidense que está a piques de cumprir sesenta e dous anos. “Temos que afondar nosas relacións con Cuba e loitar contra ese bloqueo, polo ben de Cuba e polo noso beneficio, pois o bloqueo asfixia Cuba e a nós impídenos dispor dos avances científicos e biofarmacéuticos e de toda clase que xenera Cuba e nega asemade aos nosos empresarios a opción de investir en Cuba sen temor as represalias dos EUA”. Para Pineda, compre apostar polo respeto a la soberanía cubana, e, ao tempo, defender a nosa. “Temos que independizarnos dos EUA e sermos soberanos, non delegados de Washington e compre que defendamos unha nova orde internacional multilateral, na que os pobos poidan relacionárense de forma libre, soberana, sen intromisións nin presenza ominosa de terceiros”.

TSA – Redación

O equipo do Governo de Cuba desprazado para atender os graves danos producidos pola abátega e as enxurradas en Camagüey, Las Tunas, Holguín, Granma e Santiago de Cuba identificou 1.122 vivendas afectadas, 106 delas derrubadas, 268 con desperfectos xerais de importancia, 254 teitos estragados e 352 parcialmente derramados. A provincia de Granma, foi a que recibu máis dano e ainda ten 2.101 personas protegidas, 285 delas en institucións estatatais.

A solidariedade do pobo de Cuba coa poboación afectada manifestouse de vez a partir da primeira valoración e tanto o goberno coma o CDR están a organizar o reparto da importante vaga de axudas.

Dende a Asociación de Amizade Galego-Cubana Francisco Villamil chamamos o pobo galego a expresar a súa solidariedade e paliar as consecuencias dos dramáticos sulagos que paralizaron as rexións orientais e centrais de Cuba.

Quen quixer contribuír á campaña de axuda para a adquisición de recursos de emerxencia, pode ingresar a súa doazón na conta da asociación ES67 2080 5000 6730 4019 4383. A beira da cantidade enviada debe figurar a mención: AXUDA INUNDACIÓNS

Alina S. Krueger – TSA

O Mercado da Poesía de París, convocatoria anual na que participan asociacións de editores, premios de poesía e círculos de letras do universo da expresión francesa en todo o mundo, nomeara Presidenta de Honra para a edición número 40 que se celebra este ano a poeta cubana Nancy Morejón, unha voz principal da poesía caribeña e honra da avangarda latinoamericana.  Mais a dirección do Mercado cedeu as protestas dun autor cubano emigrado que procurou o apoio do Pen Clube para impugnar a merecida Presidencia de Honra na persoa de Morejón. As ONG dependentes da CIA non tardaron en extender un expediente de ingominias contra unha das voces importantes da poesía latinoamericana. Muller e Negra, leva anos comprometida na loita pola paz, contra o racismo e as desigualdades sociais, raciais, de xénero e pola liberdade dos pobos.

Nancy Morejón ten a orgullo defender a Revolución Cubana como expresión verdadeira da demanda histórica de xustiza e independencia do seu país. Participara nas honras coas que todo o pobo de Cuba despedira a Fidel e non por estar entregada a escrita e a traducióndeixa de experimentar coma o resto da poboación da illa as consecuencias do ilegal bloqueo, o diario sementar de falsidades e prédicas de traizón que o país máis armado da terra e espello de cobiza colonial reserva para  a illa rebelde. Como millóns de compatriotas, Nancy Morejón entende que a responsabilidade de todo o mal que padece nunha sociedade en estado de cerco, incluidas as necesidades, o malestar inducido e mesmo as paciencias derramadas, son responsabilidade e obxectivo ruín do goberno imperial.

No propósito, frustrado por volta de máis de 60 anos, de intervir en Cuba e apartar a sociedade cubana do seu pleno dereito a decidir, os EUA veñen aumentando a conta de reclamacións e sancións sobre a illa deica sumala, nas horas derradeiras do goberno de Trump, á Lista de Paises Promotores do Terrorismo. De feito, o sicario que tira da levita do Pen Clube para recortar o nome dunha poeta tan grande coma Nancy Morejón, manifestara publicamente o seu apoio a un  atentado con cóctel molotov contra a embaixada de Cuba en París, en xullo de 2021 e non hai rastro nas hemerotecas de que tivese que render conta ningunha.

Armando Sio Ferreira – TSA

“Cuba desenvolveu e producíu vacinas para toda a poboación da illa e para exportar, cun orzamento de 40 millóns de Euros mentres laboratorios ingleses e dos EUA recibiron mais de cinco mil millóns. A diferenza e que estes reservaron as vacinas para os paises ricos e só desviaron ao Sur lotes sobrantes dos países do Norte”, dixo en Vigo o embaixador de Cuba en Madrid Marcelino Medina durante unha reunión coa solidariedade, partidos e sindicatos que ateigaron a Sede Nacional da Central Unitaria de Traballadores (CUT) en Vigo.

O embaixador chegou acompañado polos conselleiros Ana Belkis Rodríguez e René Capote, e das pressentacións encargouse a cónsul xeral de Cuba para Galiza, Asturias e Cantabria, Ingrid Izquierdo.

Medina contou o verdadeiro alcance das sancións ilegais, aplicadas unilateralmente polos EUA a unha illa que, tendo un tamaño inferior a un dos 5O Estados da Federación, e non contando con reservas naturais, debe  recibir víveres, consumos e combustíbeis por mar, malia abordaxes e saqueos realizado polo veciño do norte.

No actual estado de sancións e bloqueo encarnizados, que coroan máis de 60 anos de intervencionismo xenocida do governo dos EUA contra Cuba, o governo socialista levou adiante a reforma da economía, o referendo da nova Carta Magna e presentou ao Parlamento o Código de Familia, un dos máis avanzados do mundo. O proceso democrático de discusión destes textos, produciuse en milleiros de debates de base, sen interferencia nin límites.

O conselleiro de Comercio René Capote explicou que na procura de alternativas de subministro e mellor prezo, nunha situación de inflación desatada, os media dos colonialistas non arrepentidos impiden razoar e as sancións e o bloqueo esmagan todas a alternativas.

Cuba nota que malia ter producido sen axuda  vacinas que poden ser a solución da América Martiana e de África, e de protexer a poboación cun rigoroso sistema de aillamento, non pode contar polo de agora con viático económico de nengunha caste, mentres España, por exemplo, ten previsto recibir 140.000 millóns de Euros dentro do programa Next Generation. A maiores, o Estado Cubano  asistiu a súa poboación confinada co envío de víveres a domicilio por conta do Governo..

Non extraña que a recuperación do turismo avance devagar en Cuba pois considerando que unha vida vale máis que nada, o Governo antepuxo a defensa e o control da poboación a calqueroutro interese. No entanto, non por asumir os gravosos custes da abordaxe integral da COVID, deixou o Governo de Cuba de enviar  brigadas de cooperación a 42 paises. Un sacrificio dobrado para unha poboación coma a cubana baixo bloqueo dende hai máis de 60 anos. Sen recursos primarios nin finanzamento, e censurada dende o exterior a realidade de Cuba, o governo de Diaz-Canel chama a promover a inventiva mediante a Resistencia Creativa.

Santiago Badín González *

Cuba inviste múltiples recursos humanos no eido da medicina pública. Dos 485.479
traballadores e traballadoras deste sector, hai 95.487 médicos, o que supón un, ou unha, por 118
habitantes. (hai 45.025 Médicos Xerais integrais) Dentro das especialidades, salienta que hai
18.910 estomatólog@s, o que significa un, ou unha, por 595 habitantes. Rexístranse 85.732
enfermeir@s, un por 131 habitantes; 79.909 tecnólog@s da saúde, un por 185 habitantes; 61.754
outr@s licendiad@s da Saúde. En total, hai 8,5 médicos por cada mil habitantes.

Os principais indicadores de saúde revelan que a mortalidade infantil d@s menores de un ano é
de 4 por 1.000 dos nados vivos e a d@s menores de 5 anos é de 5 por 1.000. A
expectativa de vida está en 78.45 anos; a mortandade xeral é de 8.9 mortes por 1.000 habitantes. A
prevalencia das doenzas crónicas non transmisíbeis ten un programa de inmunización que protexe
contra 13 enfermidades; as doenzas cardiovasculares (218 por 100.000 habitantes) son a causa
principal de morte, seguidas polos tumores malignos (215), as enfermidades cerebrovasculares
(82,4), a influenza e neumonía (64,3) e mais os accidentes (47,4). A prevalencia do VIH na
poboación de entre 15 a 49 anos é 0.27%. Cuba é o primeiro país que erradicou a transmisión de nai
a fillo do VIH.

O programa cubano de vacinación abrangue vacinas contra doenzas xa eliminadas como a
poliomelite (dende 1962), a malaria (dende 1967), o tétanos neonatal (dende 1972), a difteria (desde
1979), a meningoencefalite post-parotidite (dende 1989), a síndrome da rubeola conxénita (dende
1989), o sarampión (desde 1993), a pertuse (dende 1994) e a rubeola (dende 1995).
Na Escola Latinoamericana de Medicina (ELAM) téñense formado 39.000 médicos de 121
países máis 28.000 médicos pertencentes aos 10 cursos académicos da ELAM. Contribúe á
cobertura da saúde doutros países, xestiona competencias e habilidades e produce e reproduce
coñecementos.
A Operación Milagre, lanzada por Fidel e Chávez, beneficia a 14 países, o estudo da
discapacidade a 6 países, a Brigada Henry Reeve a 27 países. En toral, con 372.783 colaboradores
e colaboradoras en 595.400 misións son 162 países os axudados pola medicina cubana, como por
exemplo Chile, en 1960, ou Arxelia en 1963.

A industria biotecnolóxica e farmacéutica cubana conta con 32 empresas, 78 instalacións
produtivas e 21.785 traballadores e traballadoras. A industria médico-farmacéutica e biotecnolóxica
cubana propicia no sistema de saúde o desenvolvemento de vacinas profilácticas contra doenzas
infecciosas e mellora a calidade de vida de toda a poboación producindo biofármacos para o
tratamento do cancro e posibilitando o diagnóstico temperán das doenzas.

Por exemplo, o programa de atención integral ao paciente diabético mediante o HEBERPROT-P
(cuxo creador ten a consideración de Heroe da República de Cuba) modifica o paradigma de
tratamento cun 78% de eficacia que evita as amputacións. Na actualidade hai máis de cen mil
pacientes tratados en 20 países. No caso do óso exposto que antigamente era equivalente á
amputación, despois de 18 infiltracións durante 6 semanas e a posterior cicatrización durante 51
días, a eficacia do medicamento cubano é igual ou maior ao 95% nos pacientes tratados. Con
respecto á osteonecrose de calcaneum, logo de 32 infiltracións ao longo de 10 semanas, a ferida
péchase e despois de 45 días a eficacia dos casos tratados supera o 60%.
En relación coa exportación dos servizos profesionais asociados coa saúde e coa atención
médica cubana fóra de Cuba, salientan os referidos á saúde de óptica, farmacia e produtos da
medicina natural e tradicional. O 80% dos cartos que chegan ao país procedentes da exportación dos
servizos médicos revírtese na sanidade pública cubana. Arestora, a vacina cubana contra o cancro de
pulmón comercialízase en Venezuela, Paragüai, Colombia e Vietnam, habendo ensaios clínicos nos
Estados Unidos, Reino Unido e noutros países da rexión das Américas.

Os principais retos do sistema nacional de saúde céntranse no avellentamento poboacional, nos
elevados custes, nas limitacións financeiras, na introdución de tecnoloxías de avanzada e no
bloqueo imposto contra Cuba polos Estados Unidos. O rexeitamento internacional ao bloqueo,
recrudecido pola Administración Trump, é case unánime. No sector da saúde tradúcese nunha
afectación de 104 millóns 148 mil 178 dólares e nun acumulado de 2 mil 913 millóns 772 mil 858
dólares.

*O Dr. Badin é especialista de 2º Grao en Medicina Xeral Integral e
Secretario Xeral do Sindicato Nacional de Traballadores e Traballadoras da Saúde.