Farruco Sesto – Nós Diario

Converso cun vello amigo a quen non vía desde hai tempo e que me pregunta pola situación de Venezuela. “Está moi mal aquilo por alá, verdade?”, dime, case dándoo por sentado dunha vez. “Si”, dígolle, “efectivamente está moi complicado”. 

Están a vivirse situacións de feito que, en relación á calidade de vida cotiá, son moi duras. Pero todo depende de onde te posiciones, da mirada con que vexas esa difícil realidade. Pois se elixes un punto de vista que teña que ver coa dignidade e o decoro, a xustiza, a fraternidade, a ética política, a resistencia e a capacidade de organización ante as agresións, verás unha Venezuela á que, obxectivamente tamén, terías de cualificar con dez puntos sobre dez.

Entón comezo a falarlle ao meu amigo da guerra integral, multidimensional, de novo tipo contra Venezuela, con métodos particularmente crueis e cuxo obxectivo é dobregar o ánimo dos seus habitantes. Unha guerra dirixida polos Estados Unidos coa complicidade doutros gobernos do mundo subordinados ás súas políticas, que son aqueles que no seu momento recoñeceron como presidente un monicreque autoproclamado nunha praza. Fálolle das mal chamadas sancións a que é sometida Venezuela, que non son outra cousa senón medidas coercitivas unilaterais, atentatorias contra os dereitos humanos e violatorias do dereito internacional. Lémbrolle o decreto presidencial de Obama que declara Venezuela ameaza extraordinaria e inusual para a seguridade dos EEUU, actualizado e referendado tanto por Trump como por Biden. Fálolle do cerco feroz financeiro e comercial que priva a sociedade venezolana do osíxeno económico para vivir en tempos modernos. Da imposibilidade a que se ve sometida, a través dunha persecución implacable, de efectuar transaccións no sistema financeiro internacional. Do bloqueo de materias primas e de recursos necesarios para a produción, máquinas, repostos, alimentos, medicinas, vacinas, o que sexa que necesitemos importar. Do secuestro dos seus activos no exterior. Do cerco diplomático e institucional dos EEUU e Europa, torpedeando todas as iniciativas que poidan favorecer a Venezuela. 

Dos intentos de magnicidio. Das sabotaxes eléctricas a grande escala e de enorme magnitude. Dos repetidos intentos de invasión mercenaria. Do quecemento constante das fronteiras, a través do paramilitarismo colombiano. Do feroz ataque á moeda desde o poder dos EEUU, para producir unha irracional hiperinflación e desatar a desestabilización económica, cousa que conseguiron, en procura da desestabilización política, moi lonxe de conseguir, pois “aquí non se rende ninguén”.

Cóntolle tamén da campaña da hexemonía mediática internacional, actuando sen vergonza e en bloque contra Venezuela, contra o seu pobo, contra o seu proxecto histórico de emancipación, contra os seus líderes. Unha mediática que enxalza os violentos e terroristas, converténdoos en heroes e loitadores pola liberdade, mentres cualifica de ditadura, sen razón, o goberno lexítimo dun país, que foi electo en proceso universal, libre, secreto e xusto, a través dun sistema informatizado a proba de fraude, nunha nación que, durante os últimos 21 anos efectuou 25 eleccións xerais. 

Aclárolle que, como contrapartida, o pobo venezolano resiste como ninguén. Organízase. Resolve os seus problemas de todos os días coa conciencia de ser dono do poder a través do seu goberno bolivariano, e de ser pobo feito soldado a través das FANB e a unidade cívicomilitar que blinda Venezuela contra a apátrida dereita conspiradora e contra os inimigos externos. E infórmolle que, pese ao bloqueo, Venezuela construíu nos últimos anos tres millóns e medio de vivendas para o pobo. Que foi resolvendo a cuestión alimenticia cun esforzo produtivo propio e unha xusta distribución. E fálolle do excelente resultado no control da pandemia con seus 2.500 falecidos (sempre dolorosos), notable resultado se se teñen en conta os 450.000 mortos ata hoxe do Brasil e os 84.000 de Colombia.

Dígolle que se nos deixasen ser o que somos, Venezuela ademais de ser un exemplo en termos de dignidade, como é, destacaría tamén no desenvolvemento exitoso das condicións de vida do seu pobo. Para converterse nun país potencia. Sen ningunha dúbida.

Mírame cunha certa tristeza na mirada e dime: “Ah, se vos deixasen”. Contéstolle: “Non importa, porque, de todos os xeitos, venceremos nós”.

Artigo publicado en Nós Diario 28.05.21

Axencias – Terra Sen Amos

As brigadas médicas e de xestión epidemiolóxica que tratan a Pandemia en Cuba en primeira liña, dirixidos polo ministerio de Saude Pública, asumen as competencias dos Consellos de Defensa provinciais e municipais.  A pragmática de goberno responde ao agravamento do andazo de Covid 19 entre menores e adolescentes, unha circunstancia que, segundo as últimas informacións, está a acompañar en todo o mundo a progresión das campañas de vacinación masiva. A noticia foi anunciada polo diario Granma e as emisoras de Cuba na madrugada do dia 19, despois de o presidente Diaz Canel  transmitir a preocupación do goberno pola nova afección da Pandemia sobre a poboación infantil e a mocidade.

A poucas horas de establecer a estatalización de emerxencia do seguimento e terapia da Pandemia, a doutora Lisette López González, xefa de Pediatría do Ministerio de Saúde Pública avisou que o mito da poboación infantil e xuvenil estaren blindados contra a Covid-19, fóra esvaecendo a medida que se prolongaba a loita contra a Pandemia até comprobar 22 de maio un aumento continuado de infeccións en nenas, nenos e adolescentes. No primeiro surto, a poboación pediátrica sumaba  200 casos, no segundo 600 e 22 de maio atinxiron 17.000 o que representa o 13% de casos confirmados da Covid no país.

A doutora falaba diante dunha xuntanza do comité de expertos e científicos  a que asitían o Presidente Diaz Canel e o primeiro ministro Manuel Marrero.

É opinión non confirmada mais congruente coa reforma do sistema de xestión da Pandemia na illa, que a urxente medida procura aplicar os resultados probados nas estratexias de inmunización das brigadas médicas cubanas en máis de 50 paises.  Sabendo que a dilatada experiencia da medicina de solidariedade cubana mellora e simplifica a actuación das brigadas en cada nova campaña, o que se quer é aplicar os resultados das estratexias de inmunización doutros países a Cuba, tal e como se fai nas experiencias nas misións médicas en todo mundo

O cubano Pedro Mas Bermejo, científico do Instituto de Medicina Tropical Pedro Kourí , membro da Sociedade Internacional de Avaliación de Tecnoloxías e experto nas disciplinas de hixiene, epidemioloxía, microbioloxía e nutrición, nota que o comezo das campañas de vacinación en todo o mundo amosaron unha incidencia no aumento de casos de Covid 19 asi coma picos de falecidos, mentres que os países con maior éxito nas campañas aumentaran as medidas restritivas durante o proceso.

O alto número de visitas ao enlace, aberto de a pouco en TERRA SEN AMOS, para a biblioteca e fondo documental do Consello Latinoamericano de Ciencias Sociais CLACSO e das institucións de solidariedade con Cuba de todo o Atlántico Sur, honra a alta utilidade e facilidade do sítio. A fiestra informática está situado so a cabeceira de TERRA SEN AMOS, no rubro BIBLIOTECA CUBA EN REVOLUCIÓN . Os 60 títulos ofrecidos tratan da irradiación política da Revolución Cubana sobre toda América e o mundo, editados por CLACSO en Español , e teñen unha interesante prolongación temática noutros 112 enlaces en aberto para libros e revistas en Portugués- Brasileiro dos CENTROS CLACSO BRASIL, accesíbeis dende a mesma páxina, con ensaios sobre a dinámica editorial, as políticas públicas, o debate entre a economía de control estatal e a esmagadora propaganda da privatización, parte da loita dos pobos do Atlántico Sur contra o imperialismo económico do Norte. A entrada en Portugués-Brasileiro, achéganos aos arquivos abertos das revistas CONHECER, IDÉIAS, NERA, BRAZILIAN JOURNAL OF AMERICAN STUDIES, EXTRAPRENSA, GEONORDESTE E CONTEMPORÂNEA entre outras.

CLACSO,  coa colaboración da Universidad de José C. Paz, conformou esta primeira biblioteca en acceso aberto que documenta, debate e sintetiza ideas e experiencias da historia contemporánea de Latinoamérica e o Caribe a partir da perspectiva da Revolución cubana.

A Asociación de Amizade Galego Cubana Francisco Villamil publicará en breve a o índice revisado por matérias do seu propio FONDO BIBLIOTECARIO E HEMEROGRÁFICO DA REVOLUCIÓN CUBANA, aquilatado en 35 anos de funcionamento, que poderá ser consultado previa cita no seu novo local nacional de Cánovas del Castillo 10, 1º Dta, en Vigo.

Axencias – Terra Sen Amos

Cuba condena a repetida a insólita repetición da masacre contra a poboación de Gaza e o provocador ataque perpetrado na mesquita de Al Aqsa en Xerusalén ocupada. O Ministerio de Relacións Exteriores da República de Cuba, recordou que estas agresións constitúen outra grave e flagrante violación por parte do Estado de Israel da Carta das Nacións Unidas, o Dereito Internacional e os acordos humanitarios vixentes en todo o mundo e evidencian a continuidade das prácticas de colonización e ocupación das terras árabes e palestinas, coa complicidade e a  impunidade que lles  garante EUA. De feito, o goberno de Washington bloquea co seu veto calquera iniciativa do Consello de Seguridade da ONU que critique a política colonial dos sionistas. 

Médico graduado en Cuba, participa coas bandeiras cubana e palestina nunha das protestas en Cisxordania contra a masacre de Gaza polo exército de Israel.

Asociación de Amizade Galego-Cubana Francisco Villamil – Terra Sen Amos

Máis de corenta asociacións e colectivos do Estado español veñen de constituír o MESC (Movemento Estatal de Solidariedade con Cuba), co obxectivo de coordinar accións globais de solidariedade con Cuba e a súa Revolución, e de levar a cabo o Plan de Acción aprobado nos Encontros Estatais de Solidariedade con Cuba, de carácter bienal. O MESC lanza na súa presentación unha axenda de traballo a prol de Cuba na que participan asociacións da emigración, sindicatos, partidos e entidades solidarias e internacionalistas. O bloqueo dos EUA contra Cuba, reforzado nos últimos catro anos con 242 novas sancións, impacta como nunca nas condicións de vida dun país que, por mor da Pandemia, viu reducidas ao mínimo as súas fontes de ingresos e, en consecuencia, sofre unha aguda situación de desabastecemento.

Catro son as iniciativas que apoia o MESC no seu nacemento:

1. Caravanas. 30 de maio, domingo, nalgunhas cidades do Estado español, realizaranse accións de apoio á III Caravana Mundial contra o bloqueo a Cuba, despois das dúas primeiras realizadas en marzo e abril deste ano.
2. Xornada central contra o Bloqueo. 23 de xuño, quarta feria, realizarase a Xornada central de concentracións e actos contra o bloqueo, en cando menos unha quincena de cidades do Estado, de maneira simultánea á votación na Asemblea Xeral das Nacións Unidas, que esixirá aos EEUU, por 29ª vegada, o fin da devandita política. Na última ocasión, o resultado foi de 187 votos contra tres. en Catalunya, En Catalunya, a xornada central, realizarase uns días antes, 19 de xuño, sábado.
3. Xiringas. O MESC súmase a campaña internacional “Xiringas para Cuba”, lanzada por  SOdePAZ para apoiar á Illa nos seus esforzos por inmunizar antes de rematar o ano, toda a súa poboación con vacinas propias, feito inédito entre os países do Sur e mostra de rebeldia intelixente e positiva fronte un bloqueo que atranca ilegalmente a compra de material clínico nos mercados internacionais. O obxectivo global para Europa é obter fondos para 10 millóns de xiringas. O MESC asume un millón, e xa nas próximas semanas, realizará a primeira compra, equivalente a perto de medio millón. 
4. Premio Nobel. O MESC, de igual xeito, recoñece a solidariedade de Cuba con outros pobos. Unha asistencia solidaria internacional que continúa malia a Pandemia e que no último ano, enviou 57 brigadas médicas, con cinco mil cooperantes, a maioría mulleres, a 40 estados. Por isto, o MESC, secunda a Campaña internacional polo outorgamento do Premio Nobel da Paz 2021 ao Continxente Médico Cubano “Henry Reeve”.

O MESC esixe ao goberno de Joe Biden que cumpra non só coas 28 resolucións das Nacións Unidas, senón co seu propio electorado ao que prometera a reversión da política de asfixia económica ao pobo cubano,  encarniizadamente aplicada por Donald Trump.

Convocando a participar nos actos contra o bloqueo 30 de maio e 23 de xuño, a colaborar na campaña “Xiringas para Cuba” e a sumar apoios a concesión do Premio Nobel para cooperación médica cubana, o MESC invita a particulares e entidades a participar no clamor internacional contra o cruel e ilegal cerco dunha pequena illa sen recursos resolta a defender a súa soberania e opción de goberno socialista..

Contacto de prensa: EMAIL: galegocubana@gmail.com – TELEFONE: 604 032857